ᐊᖓᔪᖃᒃ: ᑕᕐᓕᓂ ᓄᕿᖓᖅ
ᑐᖓᓕᖓ ᐊᖓᔪᖃᑉ: ᓘᒃᑖᖅ ᒥᐊᕆ ᐴᕐᓯ−ᓗᐃᔅ
ᑮᓇᐅᔭᓕᕆᔨ: ᑲᓐᓃ ᑲᐅᓐ
ᐊᒡᓚᒃᑎ: ᓴᐃᐅᒦ ᐃᒌᓯᐊᒃ
ᐃᖃᓗᐃᑦ ᓂᔾᔭᐅᓯᔭᓂᒧᑦ ᑲᑐᔾᔨᖃᑎᒋᑦ ᐱᔭᐅᑎᑦᑎᓯᒪᓕᒪᑕ ᐊᑭᖃᖏᑦᑎᓂᒃ, ᐅᐸᑐᐃᓇᕋᓴᐅᓪᓗᓂ ᓂᔾᔭᐅᓯᔭᓂᒻᒧᑦ ᐃᓕᓐᓂᐊᓂᒻᒥᒃ ᐱᒋᐊᕕᓴᐅᑎᑕᐅᓪᓗᑎᒃ ᐃᓅᓱᑦᑐᖏᓐᓄᑦ ᐃᖃᓗᐃᑦ ᐱᒋᐊᓚᖅᓯᒪᓪᓗᓂ 1996−ᒥ. ᓯᕗᓕᖅᑕᐅᓪᓗᓂ ᓄᓇᓕᒻᒥ ᑲᑎᑕᐅᓯᒪᔪᓄᑦ ᐱᓕᕆᒍᒪᑦᑎᐊᓗᑎᒃ ᐃᑲᔪᕈᒪᓯᒪᔪᓄᑦ ᑕᐃᒃᑯᓂᖓ ᐱᔭᓴᐅᑎᑦᑎᔪᓂᒃ ᐊᒻᒪᓗ ᐅᐸᑕᐅᑎᑦᑎᓱᖑᓪᓗᑎ ᓂᔾᔭᐅᓯᔭᑐᐃᓐᓇᓂᒻᒥᒃ ᐃᓕᓴᒍᑎᓂᒃ ᐊᒻᒪᓗ ᐃᓕᓐᓂᐊᖅᓯᓐᓈᕈᑎᓂᒃ ᐃᓅᓱᑦᑐᖁᑎᑦᑎᓐᓄᑦ ᐊᒻᒪᓗ ᓂᐅᕐᕈᓯᒪᔪᓄᑦ ᐃᓅᓱᑦᑐᓂᑦ ᐊᔪᖏᓂᓴᐅᓕᖁᓪᓗᒋᑦ ᐃᓕᖅᑯᓯᒻᒥᓂ ᐃᓕᓴᓐᓇᕈᑎᖏᓐᓂᒃ ᐊᒻᒪᓗ ᐱᐅᔪᒥᒃ ᐃᓱᒪᒥᒍᑦ ᖃᓄᐃᖏᑦᑎᐊᖁᓪᓗᒋᑦ.
ᑕᐃᒪᓕ ᐅᐸᑐᐃᓇᕋᓴᐅᖏᑦᑐᖅ ᓄᓇᓕᒃ ᐅᐸᑕᐅᓱᖑᒻᒪᑦ ᑭᓯᐊᓂ ᖃᖓᑕᓲᒃᑯᑦ ᐊᕐᕌᒍ−ᐊᑐᓂᓕᒫᖓᓂ ᐊᒻᒪᓗ ᖃᕋᑕᐅᔭᕈᑏᑦ ᐱᔭᒃᓴᐅᒻᒪᑕ ᐊᑭᑐᔫᓪᓗᑎᒃ ᐊᒻᒪᓗ ᑕᑯᓴᐅᑎᑦᑎᑎᐋᓐᓇᑎᒃ, ᑕᐃᒪᐃᓂᖏᓐᓄᑦ ᑭᒡᓕᓕᑎᑦᑎᓯᒪᒻᒪᑕ ᐃᓚᐅᑎᑦᑎᒍᓇᓂᑦᑎᓐᓂᒃ ᐊᓯᖏᓐᓂᑦ ᓄᓇᓕᓐᓂᒃ ᐊᒻᒪᓗ ᐱᓕᕆᔾᔪᑎᓴᖏᓐᓂᑦ. ᐊᓱᐃᓚᒃ, ᑲᑐᔾᔨᖃᑎᒋᑦ ᐋᖅᑭᒃᓱᐃᓯᒪᓕᒻᒪᑕ ᐱᓕᕆᖃᑎᒌᑦᑎᐅᔪᓂᒃ ᐃᓱᒪᖃᑎᒌᓪᓗᑎᒃ ᐃᖃᓇᐃᔭᕕᖁᑎᓂᒃ ᐊᒻᒪᓗ ᐃᓕᓐᓂᖅᑎᑦᑎᔨᓂᒃ ᓂᒋᐊᓂ ᑲᓇᑕᐅᑉ, ᐱᔭᐅᑎᑦᑎᖁᓪᓗᒋᑦ ᓂᔾᔭᐅᓯᔭᓂᒻᒧᑦ ᐃᓕᓐᓂᐊᓂᒻᒥᒃ ᐃᓕᓐᓂᐊᖅᓯᓈᕈᑎᓂᒃ ᐊᑐᕐᓂᓕᒫᖓᓂ ᐊᕐᕌᒍ ᑕᐃᒪᐃᒍᑎᒋᑎᑎᑕᐅᓗᓂ ᓄᓇᕗᑦ ᐱᖃᖏᓐᓂᖓᓄᑦ ᓂᔾᔭᐅᓯᔭᓂᒧᑦ ᓂᔾᔭᐅᓯᔭᕆᐅᓴᑎᑦᑎᕕᓐᓂᒃ, ᐊᕕᑐᖅᓯᒪᓂᒻᒥ ᓂᔾᔭᐅᓯᔭᖅᑎᓂᒃ, ᐅᕝᕙᓘᓐᓃᑦ ᓯᓚᑦᑐᖅᓴᕐᕕᔾᔪᐊᒥᒃ ᓂᔾᔭᐅᓯᔭᓂᒧᑦ ᐃᓕᓐᓂᐊᓂᒻᒥᒃ ᐃᓕᓂᐊᕈᑎᓂ. ᑕᐃᒪᐃᒻᒪᑦ, ᐋᖅᑭᒃᓱᐃᓂᖅ ᐱᓕᕆᖃᑎᒌᑦᑐᓂᒃ ᓂᔾᔭᐅᓯᔭᖅᑎᓚᕆᐅᔪᓂᒃ ᐃᓕᓐᓂᐊᖅᑎᑦᑎᔨᓂᒃ ᓂᒋᐊᓂ ᑲᓇᑕᐅᑉ ᐱᒻᒪᕆᐋᓗᕗᖅ ᐃᖃᓇᐃᔭᕆᔭᐅᓂᖓ ᐃᖃᓗᐃᑦ ᓂᔾᔭᐅᓯᔭᓂᒧᑦ ᑲᑐᔾᔨᖃᑎᒋᓂᒃ. ᑕᒪᒃᑯᐊ ᓂᒋᐊᓂ ᐱᓕᕆᖃᑎᒌᑦᑐᑦ ᐱᖃᓯᐅᑎᔭᐅᓪᓗᑎᒃ ᐱᓕᕆᖃᑎᒋᔭᐅᓂᖏᑦ ᐃᓄᐃᑦ ᐃᓐᓇᒪᕆᖏᑦ/ᐱᓕᕆᔪᓐᓇᖅᑎᑕᐅᓪᓗᑎᒃ ᐃᓄᖏᑦ/ᑕᑯᕋᓐᓈᖅᑎᑦᑎᔨᑦ ᖁᕕᐊᒋᔭᐅᔪᒪᕆᓐᓂᒃ ᑲᔪᖏᓴᐅᓂᖃᓲᖑᒪᑕ ᐊᒻᒪᓗ ᑲᔪᓰᓐᓇᖅᑐᒥᒃ ᐱᓕᕆᔨᓚᕆᐅᓂᒻᒧᑦ ᐱᕙᓪᓕᐊᑎᑦᑎᕙᓪᓗᑎ ᐅᕙᒍᑦ ᓄᓇᓕᑦᑎᓐᓂ ᐃᓕᓴᐃᔨᖁᑎᑦᑎᓐᓄᑦ.
ᐅᐸᑐᐃᓇᕋᓴᐅᖏᑦᑐᖁᑎᕗᑦ ᓄᓇᓕᐸᐅᔭᖅ ᐱᖃᓚᐅᕐᒪᑦ ᖃᔅᓰᓐᓇᕈᓗᓐᓂᒃ ᐃᓕᓴᕆᔭᐅᓯᒪᓗᑎᒃ ᓂᔾᔭᐅᓯᔭᓂᒧᑦ ᐃᓕᓐᓂᐊᕈᑎᓂᒃ ᓇᓖᕋᕕᓴᐅᔪᓂᒃ ᐱᔭᓴᐅᑎᑕᐅᔪᖃᓚᐅᒻᒪᑦ ᐃᓅᓴᑦᑐᖁᑎᑦᑎᓄᑦ ᐱᒋᐊᖅᑎᑕᐅᓚᐅᖏᓐᓂᓕᒫᖏᓂ ᑲᑐᔾᔨᖃᑎᒋᒃ ᓴᕿᑎᑕᐅᒐᓱᐊᓂᖏᓐᓂ. ᑕᐃᒪᖓᓂᑦ ᐱᒋᐊᖅᑎᑕᐅᒪᐅᖅᓯᒪᒻᒪᓂᑦ, ᐃᑲᔪᕈᒪᓯᒪᔪᑦ ᐃᒪᓐᓇᐃᓘᖅᓯᒪᓕᖁᑦ:
- ᐱᔭᐅᑎᑦᑎᕙᓪᓗᓂ ᐊᕐᕌᖑᑕᒪᑦ ᐱᓇᓱᐊᕈᓯᓕᒫᖅᑐᓂᒃ ᐊᐅᔭᒃᑯᑦ ᓂᔾᔭᐅᓯᔭᓂᒧᑦ ᓇᔪᖅᑕᐅᓲᓂᑦ ᒪᑯᓄᖓ 100 ᐊᒥᓲᓂᖅᓴᓄᓪᓘᓐᓂᑦ ᐃᓅᓱᑦᑐᓄᑦ ᑕᐃᒪᖓᓂᑦ ᐊᐅᒎᓯ, 1996−ᒥᓂᒃ
- ᐱᒐᓴᐅᓕᖅᑎᑦᑎᓪᓗᑎᒃ ᐊᒋᐊᒐᓂᒻᒧᑦ ᐃᓕᓐᓂᐊᕈᑎᓂᒃ ᐊᑐᓂᓕᒫᖓᓂ ᐃᓕᓐᓂᐊᓇᐅᑉ ᐊᕐᕌᒍᖓ ᐱᒋᐊᓪᓗᓂ 1995−ᒥᒃ ᐊᒻᒪᓗ ᐃᙱᕈᑎᓄᑦ ᐃᓕᓴᔪᑎᓂᒃ ᐱᒋᐊᓗᓂ 2017−ᒥ
- ᐋᖅᑭᖃᑎᒌᑦᑎᑦᑎᓯᒪᓪᓗᑎᒃ ᓂᔾᔭᐅᓯᔭᓂᒧᑦ ᐃᓕᓐᓂᐊᕈᑎᓂ ᐃᓕᓐᓂᐊᕕᓐᓂ, ᐊᒻᒪᓗ ᑲᔪᓯᑦᑎᐊᓚᐅᑐᑎᒃ ᐋᖅᑭᓯᓂᖏᑦ ᐅᑎᖅᑎᑦᑏᓪᓗᒋᑦ ᓂᔾᔭᐅᓯᔭᓂᒧᑦ ᐃᓕᓐᓂᐊᖅᑎᑦᑎᔨᐅᓂᐊᖅᑐᓂᒃ ᐃᓕᓐᓂᐊᕐᕕᐋᓗᒻᒥ ᐃᖃᓇᐃᔭᖅᑎᒥᒃ
- ᐅᐸᒃᑕᐅᑎᑦᑎᓪᓗᑎᒃ ᐊᒥᓱᐋᓗᓐᓂᒃ ᐱᓇᓱᐊᕈᓯᓕᒫᖅᑐᓂᒃ ᐃᙱᖃᑕᖃᑎᒋᒃᑐᓂ ᐃᓕᓐᓂᐊᖅᓯᓐᓈᖅᑎᑦᑎᓪᓗᑎᒃ ᐊᒻᒪᓗ ᐊᓯᖏᓐᓂᑦ ᓂᔾᔭᐅᓯᔭᕈᑎᓕᕆᓂᕐᒧᑦ ᐃᓕᓐᓂᐊᖅᓯᓈᖅᑎᑦᑎᓪᓗᑎᒃ ᐱᕚᓪᓕᕈᑕᐅᓪᓗᑎᓪᓗ ᐊᒻᒪᓗ ᐃᑲᔪᑐᑎᒃ ᓂᔾᔭᐅᓯᔭᖅᑎᑦᑎᓐᓂᒧᑦ ᐃᓕᓐᓂᐊᓂᒻᒥᒃ ᐃᓕᓐᓂᐊᕐᕕᓐᓂ
- ᐃᑲᔪᓚᐅᖅᓯᒪᒻᒪᑦ ᐋᖅᑭᒃᓯᓪᓗᓂ ᑐᓴᓐᓂᕆᔭᐅᓲᓂᒃ ᓂᔾᔭᐅᓯᔭᓂᒧᑦ ᑐᓴᕋᓐᓈᖅᑎᑦᑎᓂᒻᒥᒃ, ᐊᓕᐊᓇᐃᑦ, ᐱᒋᐊᓕᕋᑖᓚᐅᖅᓯᒪᑎᓪᓗᒋᑦ ᐊᕐᕌᒍᖏᓐᓂ
- ᐱᔭᐅᑎᑦᑎᓪᓗᑎᒃ ᐊᐅᓚᑦᑎᓂᒻᒧᑦ ᐃᑲᔪᕈᑎᓂᒃ ᐅᑯᓄᖓ “ᐃᒫ” ᐱᓕᕆᖃᑎᒌᑦᑐᑦ 2020 ᐅᑭᐅᖅᑕᖅᑐᕐᒥ ᑲᔪᖏᑦᑎᐊᓂᒧᑦ ᓵᓚᒃᓴᐅᓯᐊᒃᓴᓂᒃ ᓄᑖᑦ ᐱᓕᕆᐊᓴᓂ
ᑲᑐᔾᔨᖃᑎᒋᑦ ᐊᑐᖅᑕᐅᑎᑦᑎᓱᖑᒪᑕ ᓂᔾᔭᐅᓯᔭᕈᑎᓂᒃ ᐊᑭᖃᑎᑕᐅᓇᑎᒃ ᐊᑐᖅᑕᐅᑎᓪᓗᒋᑦ ᓂᔾᔭᐅᓯᔭᖃᑕᐅᔪᓄᑦ, ᐃᑲᔪᕈᑎᒋᔭᐅᓗᑎᓪᓘᓐᓂᑦ ᐅᕝᕙᓘᓐᓃᑦ ᓂᐅᕕᐊᖑᑎᑕᐅᓗᑎᒃ ᓄᐊᓴᐃᓂᒃᑯᑦ ᐅᕝᕙᓘᓐᓃᑦ ᐱᕕᐊᓇᑦᑐᒃᑯᑦ ᐃᑲᔪᕈᑕᐅᓗᑎᒃ ᓂᔾᔭᐅᓯᔭᓂᖅ ᐱᕚᓪᓕᕈᑕᐅᓂᖓᓄᑦ ᐊᒻᒪᓗ ᐊᓯᖏᓐᓄᑦ ᐱᓕᕆᖃᑕᐅᔪᖁᑎᑦᑎᓐᓄᑦ.
ᐃᖃᓗᐃᑦ ᓂᔾᔭᐅᓯᔭᓂᒧᑦ ᑲᑐᔾᔨᖃᑎᒋᑦ ᐊᔅᓱᐋᓗᒃ ᐱᕚᓪᓕᖅᑎᑦᑎᓯᒪᒻᒪᑕ ᓄᓇᓕᑦᑎᓐᓂᒃ. ᐊᕐᕌᒍᑕᒪᑦ ᐊᐅᔭᒃᑯᑦ ᓂᔾᔭᐅᓯᔭᓂᒧᑦ ᓇᔪᖅᑕᐅᓲᑦ ᐱᒻᒪᕆᐋᓗᒻᒪᑕ ᖃᓄᐃᓕᐅᖅᑎᑦᑎᓂᐅᓲᓂ ᐃᓚᒌᓄᑦ ᓄᓇᓕᑦᑎᓐᓂ ᐊᒥᓱᓪᓗ ᕿᑐᙵᖃᒃᑎᐅᔪᑦ ᐋᖅᑭᓱᐃᓲᖑᓕᒪᑕ ᐊᐅᔭᒃᑯᑦ ᕿᑲᓂᕆᓂᐊᖅᑕᒥᓐᓂᒃ ᓈᒻᒪᑎᑦᑎᓇᓱᐊᓕᓪᓗᑎᒃ ᕿᑐᙵᓂ ᐃᓚᐅᒍᓐᓇᖁᓪᓗᒋᑦ ᓂᔾᔭᐅᓯᔭᖃᑎᒋᑦᑐᓂᑦ. ᐊᒥᓱᑦ ᓇᔪᖅᑕᐅᖃᑦᑕᓚᐅᖅᓯᒪᒧᓂ ᐱᓕᕆᖃᑕᐅᖃᑦᑕᖅᓯᒪᔪᑦ ᐃᓕᓐᓂᐊᕈᑎᓂᒃ ᐃᓕᓴᐃᖃᑦᑕᓕᒻᒪᑕ ᐊᐅᔭᒃᑯᑦ ᓂᔾᔭᐅᓯᔭᓂᒻᒧᑦ ᓇᔪᖅᑕᐅᓲᓂᒃ ᐅᕝᕙᓘᓐᓃᑦ ᐃᑲᔪᖃᑦᑕᓪᓗᑎᒃ ᐃᓕᓐᓂᐊᖅᓯᓐᓈᓂᒻᒥ ᓄᓇᓕᒻᒥ ᐊᑐᓂᓕᒫᖓᓂ ᐊᕐᕌᒍ. ᓇᔪᖅᑕᐅᖃᑦᑕᓚᐅᖅᓯᒪᔪᓂ ᐱᓕᕆᖃᑕᐅᖃᑦᑕᖅᓯᒪᔪᑦ ᐱᒋᐊᖅᑎᑦᑎᓯᒪᓕᒻᒪᑕ ᓂᔾᔭᐅᓯᔭᓂᒧᑦ ᓇᔪᖅᑕᐅᖃᑦᑕᖅᑐᓂᒃ ᐊᓯᖏᓐᓂ ᓄᓇᕗᑉ ᓄᓇᓕᖏᓐᓂ (ᑐᑭᓕᐅᑎᓗᒍ ᐸᓐᓂᖅᑐᒻᒥ, ᐃᒡᓗᓕᖕᒥ, ᐊᒻᒪᓗ ᑲᖏᖅᖠᓂᕐᒥ) ᐅᕝᕙᓘᓐᓃᑦ ᐱᒋᐊᖅᑎᑦᑎᓪᓗᑎᒃ ᓇᒻᒥᓂᖅ ᓂᔾᔭᐅᓯᔭᖃᑎᒋᑦᑐᓂᒃ (ᑐᑭᓕᐅᑎᓗᒍ ᔨᐅᕆ ᑳᓐ, ᑐᕋᐃᑦ ᐋᑉᔅ) ᑕᐃᒃᑯᐊᓗ ᓂᔾᔭᐅᑎᓕᖅᓯᒪᓪᓗᑎᒃ ᐊᒻᒪᓗ ᓂᔾᔭᐅᓯᔭᖃᑦᑕᖅᓯᒪᓪᓗᑎᒃ ᓂᔾᔭᐅᓯᔭᕆᐊᖅᓯᒪᔪᓂ ᑲᓇᑕᓕᒫᒥ. ᐊᓯᖏᑦ ᐱᓕᕆᓕᓲᖑᒪᑕ ᓄᓇᓕᒻᒥ ᓂᔾᔭᐅᓯᔭᓂᒧᑦ ᐱᓕᕆᖃᑕᐅᓪᓗᑎᒃ ᑕᑯᕋᓐᓈᖅᑎᑦᑎᓂᒻᒥ. ᐱᑕᖃᒻᒪᑦ ᐊᒥᓱᓂᒃ ᖁᕕᐊᓇᖅᑐᓂᒃ ᐃᒻᒥᓄᖓᔪᓂᒃ ᐅᓂᒃᑲᐅᓯᓐᓂᒃ ᖃᓄᖅ ᖃᐅᔨᓇᓱᐊᕕᓴᐅᓕᓂᖓ ᓂᔾᔭᐅᓯᔭᓂᖅ ᐃᑲᔪᓂᖃᓲᖑᒪᖓᑦ ᐃᓅᓱᑦᑐᓂᒃ ᐃᓄᓐᓂᒃ ᐊᓂᒍᐃᒐᓱᐋᓱᖑᒪᑕ ᓇᒻᒥᓂᖅ ᐊᔅᓱᕈᕈᑎᒋᔭᒥᓐᓂᒃ, ᐊᒻᒪᓗ ᓵᓚᐅᑐᐃᓇᕈᓇᐃᓕᓂᓴᐅᓗᑎᒃ. ᐃᖃᓇᐃᔭᕕᖁᑎ ᐱᔭᐅᑎᑦᑎᓯᒪᓕᕐᒪᑦ ᓂᔾᔭᐅᓯᔭᓂᒧᑦ ᐃᓕᓐᓂᐊᓂᒻᒥᒃ ᐱᓕᕆᒋᐊᕕᓴᖃᓕᖅᑎᑦᑎᓂᒻᒥᒃ ᐊᒥᓱᓄᑦ ᐃᓅᓱᑦᑐᓄᑦ ᐅᖓᑖᓄᑦ ᑎᓴᒪᐅᓕᓯᒪᓂᖓᓄᑦ ᕼᓇᓚᐃᑦ ᐊᕐᕉᒍᐃᑦ.
ᑲᑐᔾᔨᖃᑎᒌᑉ ᐃᓕᖅᑯᓯᕆᓚᐅᖅᑕᖏᑦ ᑕᑯᓴᐅᑎᑦᑎᒪᑕ ᐱᓕᕆᓂᕆᓱᖏᑦ ᐊᑐᖅᑕᐅᖏᓇᕈᓐᓇᒻᒪᑕ. ᐱᒍᒪᑦᑎᐊᓂᖏᑦ ᐱᔭᐅᑎᑦᑎᓗᑎᒃ ᐃᓅᓱᑦᑐᓄᑦ ᑐᓂᕈᓯᐊᖃᒃᓯᒪᔪᓂᒃ ᓂᔾᔭᐅᓯᔭᓂᒻᒥᒃ ᐃᑲᔪᖅᓱᑕᐅᑎᐊᒪᑕ ᐃᒻᒥᓂᖅᓱᖅᑐᓄᑦ, ᓄᓇᓕᒻᒥᒃ ᐊᒻᒪᓗ ᐊᕕᑦᑐᖅᓯᒪᔪᓂᒃ ᓇᒻᒥᓂᖁᑎᒋᔭᐅᔪᓂᒃ, ᓄᓇᓕᖃᕕᐅᔪᒧᑦ ᑮᓇᐅᔭᖃᑦᑎᑦᑎᒍᑎᑦ ᐱᓕᕆᔾᔪᑎᖏᓐᓄᑦ, ᐊᒻᒪᓗ ᑲᓇᑕᒥ ᓴᓇᙳᐊᒐᖁᑎᓄᑦ ᐃᓂᖃᒃᑎᑦᑎᕕᐅᔪᓄᑦ ᓂᔾᔭᐅᓯᔭᓂᒧᑦ ᑕᑯᓴᐅᑎᑕᐅᓗᑎᒃ ᐱᓕᕆᔾᔪᑎᒧᑦ. ᐃᑲᔪᖅᑕᐅᓪᓗᑕ ᒐᕙᒪᑐᖃᒃᑯᑦ ᑮᓇᐅᔭᖃᒃᑎᑦᑎᓚᐅᒻᒪᑕ ᐃᓅᓱᑦᑐᑦ ᑖᐅᖅᓯᖃᑎᒌᓂᒻᒧᑦ ᐃᓕᓐᓂᐊᕈᑎᓂ, ᐃᖃᓗᐃᑦ ᓂᔾᔭᐅᓯᔭᓂᒧᑦ ᑲᑐᔾᔨᖃᑎᒋᖏᑦ ᐸᕐᓇᓚᐅᒻᒪᑕ ᐊᒻᒪᓗ ᐅᐸᒍᑎᑎᑦᑎᓪᓗᑎᒃ ᐊᒥᓱᓄᑦ ᑕᐅᖅᓰᖃᑎᒋᓗᑎᒃ ᐊᓯᒥᓐᓂᒃ ᓂᔾᔭᐅᓯᔭᖅᑎᐅᖃᑕᐅᔪᓂ ᐃᖃᓇᐃᔭᕕᖁᑎᓂ ᐋᑐᕚᒥ ᐊᒻᒪᓗ ᕼᓕᐹᒃᓯᒥᒃ. ᑕᒪᒃᑯᐊ ᐱᓕᕆᒋᐊᕕᓴᐅᓕᓂᖏᑦ ᐱᒐᓴᐅᑎᑦᑎᒪᑕ ᓱᕈᓯᖁᑎᑦᑎᓐᓄᑦ ᐃᓚᓕᐅᑎᑦᑎᐊᕈᓐᓇᖁᓪᓗᒋᑦ ᐊᓯᖏᓐᓄᑦ ᓄᓇᓕᓐᓄᑦ ᑕᒪᒃᑯᑎᒎᓇ ᐱᖃᖃᑎᒌᓂᒃᑯᑦ ᐅᖃᓚᒍᓯᖏᑎᒍ ᓂᔾᔭᐅᓯᔭᓂᑦ; ᐃᓅᓱᑐᖁᑎᕗᑦ ᐱᕕᓴᖃᓕᖅᓯᒪᒻᒪᑕ ᑕᑯᒍᓇᖅᓯᓗᑎᒃ, ᐊᒻᒪᓗ ᓂᔾᔭᐅᓯᔭᓗᑎᒃ ᓂᔾᔭᐅᓯᔭᖃᑎᒌᑦᑐᓂ; ᐊᒻᒪᓗ ᐃᓅᓱᑦᑐᑦ ᓂᒋᒦᖓᖅᓯᒪᔪᑦ ᖃᐅᔨᒋᐅᓪᓗᑎᒃ ᐱᐅᓂᖓᓂᒃ ᓄᓇᕗᑉ ᓄᓇᖏᓐᓂᒃ, ᐃᓄᖏᓐᓂᒃ, ᐊᒻᒪᓗ ᐃᓕᖅᑯᓯᖏᓐᓂᒃ.
ᑐᕌᑎᒍᒪᒐᑦᑎᒍ ᑖᓐᓇ ᒪᑉᐱᒐᖅ ᓇᓗᓇᐃᔭᐃᓗᑕ ᑲᑐᔾᔨᖃᑎᒋᑐᖁᑎᑦᑕ ᐃᓕᖅᑯᓯᕆᖃᑦᑕᓚᐅᖅᑕᖏᑦ ᐃᖃᐅᒪᓗᒋᑦ ᐅᒨᓇ
ᕕᐊᕝ ᕗᕋᐅᓐ
ᓯᕗᓪᓕᖅᐹᖁᑎᕗᑦ ᐱᓕᕆᒍᒪᓯᐊᖅᑐᓂ ᕿᑐᙵᖃᒃᑎ ᐊᒻᒪᓗ ᓄᓇᓕᒻᒥ ᐃᑲᔪᕈᒪᓯᒪᓪᓗᓂ,
ᐃᖃᓗᐃᑦ ᓂᔾᔭᐅᓯᔭᓂᒧᑦ ᑲᑐᔾᔨᖃᑎᒋᑦ ᑮᓇᐅᔭᖃᑎᑦᑎᖃᑕᐅᓪᓗ ᐊᒻᒪ ᓯᕗᓪᓕᖅ ᐊᖓᔪᖄᖓ
ᐱᓕᕆᒍᒪᓯᒪᓂᕆᔭᖓ ᓂᔾᔭᐅᓯᔭᓂᒻᒧᑦ ᐃᓕᓐᓂᐊᖅᑎᑦᑎᓂᒻᒥᒃ ᑲᔪᓯᒻᒪᑦ ᒫᓐᓇᒧᑦ… ᑕᒪᒃᑯᑎᒎᓇ ᐊᓯᓱᑎᒍ ᓂᔾᔭᐅᓯᔭᖃᑎᒌᑦᑐᑎᒍ, ᐃᓕᓴᐃᔨᐅᔪᓂ, ᓯᕗᓕᖅᑎᐅᔪᓂ ᐱᓕᕆᒍᒪᑦᑎᐊᓕᖅᑎᓚᐅᖅᑕᖏᓐᓂᒃ ᐊᒻᒪᓗ ᑲᔪᖏᓕᖅᑎᓚᐅᖅᑕᖏᓐᓂ.
ᐃᓕᓐᓂᐊᖅᑎᑦᑎᒍᑎᕗᑦ ᑐᙵᕕᖃᒃᑎᑕᐅᒻᒪᑕ ᐃᓄᐃᑦ ᖃᐅᔨᒪᔭᑐᖃᖏᑕ ᒪᓕᒃᑕᐅᒋᐊᖃᓂᖏᓐᓂᒃ ᒪᑯᓂᖓ:
- ᑐᙵᓇᕐᓂᖅ − ᑐᙵᓱᑦᑎᑦᑎᓗᓂ, ᑐᙵᓇᓪᓗᓂ, ᐊᒻᒪᓗ ᐃᓚᐃᓐᓈᖏᓪᓗᓂ. ᐱᔭᓴᐅᑎᑦᑎᒐᑦᑕ ᐃᓕᓐᓂᐊᖅᑎᑦᑎᒍᑎᑦᑎᓐᓂᒃ ᐊᑭᖃᓇᒋᑦ ᐊᑭᓖᒋᐊᑐᑎᖏᓪᓗᒋᑦ ᐃᓘᓇᑎᒃ ᐃᓅᓱᑦᑐᓕᒫᑦ. ᐊᑐᐃᓇᐅᑎᑦᑎᓪᓗᑕ ᐊᑐᖅᑕᐅᒍᓇᖁᓪᓗᒋᑦ ᓂᔾᔭᐅᓯᔭᕈᑏᑦ.
- ᐃᓅᖃᑎᒌᑦᓯᐊᕐᓂᖅ − ᐃᑉᐱᒋᑦᑎᐊᓗᒋᑦ ᐊᓯᑎᑦ, ᐃᓚᒋᑦᑎᐊᓪᓗᒋᑦ, ᐊᒻᒪᓗ ᐃᓱᒪᖏᑦᑎᐊᓗᒋᑦ ᐃᓅᖃᑎᑎᑦ. ᐱᔭᐅᑎᑦᑎᓲᖑᔪᒍᑦ ᑲᑎᑕᐅᓯᒪᔪᓂᒃ ᐃᓕᓴᑎᑦᑎᓗᑕ, ᐃᓕᓐᓂᐊᖃᑕᐅᔪᓪᓗ ᐃᓕᑦᑎᓲᖑᓪᓗᑎᒃ ᐃᐱᒋᑦᑎᐊᖃᑦᑕᐅᑎᒍᓐᓇᖅᓯᓗᑎᒃ, ᓈᓚᒍᓇᓯᓪᓗᑎᒃ, ᐃᓕᑦᑎᓗᑎᒃ ᑐᓴᕋᓈᒐᓕᐅᕈᓐᓇᖅᓯᓪᓗᑎᒃ ᑲᑐᔾᔨᓗᑎᒃ ᐊᒻᒪᓗ ᐃᓗᐃᑦᑐᕈᕈᑕᐅᓪᓗᑎᒃ.
- ᐱᓕᒻᒪᒃᓴᓂᖅ − ᐱᓕᕆᑦᑎᐊᕈᓐᓇᓃᑦ ᐊᒻᒪᓗ ᖃᐅᔨᒪᓂᖅᑖᓂᕐᒥᒃ. ᑕᒪᒃᑯᑎᒎᓇ ᐃᓕᑉᐸᓕᐊᓂᒃᑯᑦ ᐃᙱᓪᓗᓂ ᐅᕝᕙᓘᓐᓃᑦ ᓂᔾᔭᐅᓯᔭᕈᑎᖃᓪᓗᓂ, ᐃᓕᓐᓂᐊᖃᑕᐅᔪᑦ ᐃᓕᑦᑎᓲᖑᒪᑕ ᐊᒥᓱᓂᒃ ᓂᔾᔭᐅᓯᔭᓂᒧᑦ ᐱᒋᐅᕈᑎᓂᒃ, ᐊᒻᒪᓗ ᖃᐅᔨᒪᓂᒻᒥᒃ ᐊᒻᒪᓗ ᐱᓕᕆᑦᑎᐊᕈᓐᓇᓂᒻᒥᒃ ᐊᒥᓱᒪᕆᐋᓗᓐᓂ ᐊᓯᖏᓐᓂ ᐊᑐᖅᑕᐅᒍᓇᖅᑐᓂ ᑐᑭᓕᐅᑎᓗᒍ ᐃᓅᖃᑎᒋᓕᕆᓂᒻᒥ ᐱᓕᕆᒍᓇᑦᑎᐊᓂᐅᔪᓂᒃ ᐊᒻᓗ ᓯᕗᓕᖅᑎᐅᓂᒻᒥᒃ ᓇᒻᒥᓂᒻᒧᑦ ᐊᓯᒥᓄᓪᓗ.
- ᐱᓕᕆᖃᑎᒌᓐᓂᖅ − ᐃᖃᓇᐃᔭᖃᑎᒋᓗᑎᒃ ᐊᔾᔨᒌᒥᒃ ᐊᑐᕋᓱᐊᓗᑎᒃ. ᓱᕈᓰᑦ ᐃᓕᑦᑎᓕᖅᑎᓗᒋᑦ ᑐᓴᓂᕋᑦᑎᑦᑎᖃᑎᒌᓪᓗᑎᒃ, ᑕᑯᓲᖑᒪᑕ ᐊᒻᒪᓗ ᑐᓵᓪᓗᑎᒃ ᐱᐅᓂᖓᓂᒃ ᐃᖃᓇᐃᔭᖃᑎᒋᓂᐅᑉ ᐊᔾᔨᒌᒥᒃ ᐊᑐᕋᓱᐊᓗᑎᒃ.
- ᐱᔨᑦᓯᕐᓂᖅ − ᐱᔨᔅᓯᕕᖃᓂᖅ. ᐃᓕᓐᓂᐊᖃᑕᐅᔪᑦ ᐃᓕᑦᑎᓲᖑᒪᑕ ᐃᑲᔪᖃᑦᑕᐅᑎᓗᑎᒃ ᐃᓕᑉᐸᓪᓕᐊᓂᒻᒥᓐᓂᒃ. ᐱᓕᕆᖃᑦᑕᒻᒥᔪᑦᑕᐅᖅ ᑐᓴᕋᓐᓈᖅᑎᑦᑎᓗᑎᒃ ᐊᓯᖏᓐᓄᑦ; ᐊᒻᒪᓗ ᐋᖅᑭᓱᐃᕙᓪᓗᑎᒃ ᓴᓗᒪᓴᐸᓗᑎᓪᓗ ᓯᕗᓂᖓᒍᑦ ᐊᒻᒪᓗ ᐱᔭᕇᒃᓯᒪᓕᖅᑎᓗᒋᑦ ᐃᓕᓐᓂᐊᓂᒻᒥᒃ.
- ᖃᓄᖅᑑᕐᓂᖅ − ᐱᓕᕆᒋᐊᕈᑎᓴᕋᕈᓐᓇᓪᓗᓂ ᐊᑲᐅᙱᓕᐅᕈᑎᖃᕈᓐᓃᖅᑎᑦᑎᓂᒻᒧᑦ. ᐃᓕᑉᐸᓪᓕᐋᓗᓂ ᑕᑯᕙᓪᓕᐊᓗᒋᑦ ᐋᖅᑭᓱᔅᓯᒪᒍᓯᖏᑦ ᓂᔮᑎᑦᑎᓂᒻᒥ, ᐃᓕᑦᑎᓗᓂ ᓄᑖᓂᒃ ᐱᓕᕆᒋᐅᕈᓯᓐᓂᒃ ᐊᒻᒪᓗ ᓂᔾᔭᐅᓯᔭᓂᖅ ᐃᑲᔪᓲᖑᒻᒪᑦ ᐃᓕᓐᓂᐊᖃᑕᐅᔪᓂᒃ ᐊᓯᕈᑕᕈᓐᓃᓪᓗᑎᒃ ᐊᒻᒪᓗ ᐱᓕᕆᒐᓱᑦᑎᐊᓲᖑᓕᓪᓗᑎᒃ.
- ᐋᔩᖃᑎᒌᓐᓂᖅ − ᐊᖏᖃᑎᒋᓗᓂ ᐃᓱᒪᓕᐅᖃᑎᒌᓂᖅ − ᑐᑭᓯᓇᖅᓯᑎᓪᓗᒍ ᑐᓴᕋᓐᓈᖅᑕᐅᔪᖅ ᐊᒻᒪᓗ ᐃᓱᒪᓕᐅᕈᑎᖃᓪᓗᓂ ᖃᓄᖅ ᐊᒻᒪᓗ ᓇᓕᐊᒃ ᑐᓴᔅᓴᐅᓂᖓᑕ ᓂᓪᓕᐊᓂᖓ ᐃᑲᔪᕋᔭᒻᒪᖔᑦ ᐃᓕᓐᓂᐊᖃᑕᐅᔪᒥᒃ ᑐᑭᓯᖁᓪᓗᒍ ᐊᒻᒪᓗ ᐊᑐᑦᑎᐊᓪᓗᒍ ᒪᓕᑕᐅᒋᐊᓕᒃ ᐱᐅᓂᖅᓴᒃᑯᑦ.
- ᐊᕙᑎᑦᑎᓐᓂᒃ ᑲᒪᑦᓯᐊᕐᓂᖅ − ᐊᕙᑎᓕᕆᓂᒻᒥ ᑲᒪᔨᐅᓂᖅ − ᐃᑉᐱᒋᑦᑎᐊᓗᒍ ᓄᓇ/ᐃᓕᓴᕕᒋᔭᑦᑎᓂ ᐃᓂᒋᔭᕗᑦ ᐊᒻᒪᓗ ᖃᓄᖅ ᓴᓗᒪᑎᑦᑎᐊᕈᓐᓇᒻᒪᖔᑦᑎᒍ ᐊᒻᒪᓗ ᐱᓕᕆᒍᑎᒋᒍᓇᖅᑕᕗᑦ (ᑕᒪᒻᒥᒃ ᑕᐃᒪᓐᓇᐃᑦᑑᓂᖏᓐᓂ ᐊᒻᒪᓗ ᓴᓇᔭᐅᓯᒪᔪᓂ ᑐᑭᓕᐅᑎᓗᒍ ᓂᔾᔭᐅᓯᔭᕈᑏᑦ ᐱᒻᒪᕆᐋᓗᒻᒪᑕ ᐊᑐᕆᐅᓴᔭᐅᑎᓪᓗᒋᑦ ᐃᓕᓐᓂᐊᑎᖁᑎᑦᑎᓐᓄᑦ ᐃᓕᑉᐸᓪᓕᐊᒍᑕᐅᓪᓗᑎᒃ).

